Ngayong Pasko ang Henyo kong Ninong nagtago sa Six Pocket kong Pantalon na amoy Paksiw

♪ Ang pasko ay sumapit.. Tayo ay mangagsiLAPIT.. sa magagandang ninang.. sa nag-gugwapong mga ninong... ♪ Pasko na!

Ano nga ba ang pasko? Para saan nga ba ang pasko? Para sa mga bata lang ba talaga ang pasko? Bakit may pasko? Bakit ipinagdiriwang ang pasko? Anong meron pag pasko? Kailangan bang maraming tanong pag pasko? Bakit ang dami kong tanong ngayong pasko? :)

Pasko Henyo. Category: May kinalaman sa Pasko.
Lugar ba to? - Hindi.
Keso de bola? Hamon? Spaghetti? Fruit salad? - Hindi.
Pagkain ba to? - Hindi.
Regalo? Aguinaldo? Noche buena? Parol? Christmas tree? - Hindi.
Bagay ba to? - Hindi.
Rudolf? - Hindi.
Hayop ba to? - Hindi.
So tao? - Hmmm, Oo. Pwede.Hindi.
Ninong? Ninang? Santa Claus? Mrs. Santa? - Hindi.
E ano?
Tut tut. Tut tut. Time is up!

Yan lang ba naiisip natin pag pasko? Isa ka rin ba sa marami na nakakalimutan ang tunay na dahilan kung bakit may pasko? Sabi ko nga sa post ko sa facebook at twitter. “Do not forget, JESUS CHRIST is the reason for this season. Not SANTA CLAUS or the AGUINALDOs from ninang and ninong. :)”
Ang pasko ay ang araw ng kapanganakan ni Jesu Kristo, ang ating dakilang tagapagligtas. Oo alam ko, na alam mo na ang bagay na yan, pero baka lang kasi nakalimutan mo. :)

December 25. December 25 nga ba talaga ang birthday ni Jesus? Mahaba habang diskusyunan pa ang mangyayari kung hahalungkatin natin ang kasaysayan para sa totoong birthday ni Jesus. Well, wala naman tayo sa debate kaya saka na natin yan pag-usapan. Hindi man yan ang eksaktong date, ang importante ang kaligayahang dulot nito sa buhay ng bawat isa.”Let’s forget about the date, the spirit of Christmas is the reason why we celebrate.” Noks nomon! :)

Pasko. Paksiw. Pasko. Paksiw. Pakso Paskiw. Minsan ang buhay ng tao parang ”tongue twister”, nakararanas ng kalituan, kamalian o kaguluhan, na humahantong sa isang ”paksiw na buhay” na puno ng kalungkutan, pagkabalisa, pagkabagabag o kawalan ng pagasa. Marahil ilan sa ating mga kababayan ngayon sa Bisayas at Mindanao pati na rin sa mga kamag-anak nila sa Luzon ay nararanasan ang ”twisted life” o kapighatian sa buhay ngayong pasko dahil sa trahedyang nangyari sa nakalipas na bagyong Sendong. Naway gabayan sila ng Panginoong Jesu-Kristo sa panibagong yugto ng kanilang buhay. Ang bawat mesa nila ay naway mapuno sana ng pag-asa at kasiyahan ngayong pasko. Umahon pa rin sana sa kanila ang tunay na diwa ng kapaskuhan, para hindi maging PAKSIW ang PASKO nila.

Taguan tayo ngayong pasko. Huwag munang mag ANGRY BIRDS, magtaguan muna tayo. Taguan, ang larong Pinoy na hindi naluluma, lalo na tuwing sumasapit ang araw ng kapaskuhan. Naalala ko noong bata ako, sa ayaw at sa gusto ko, ako lagi TAYA tuwing pasko. Hinahanap ang dalawang nagtatago kong mga ubod ng GALANTE, napaka-thoughtful kong mga NINONG. Dalawa na nga lang sila, tinataguan pa ako. Hindi ba nila alam na HINDI NAMAN talaga PERA ang habol ko? (Weh? Di nga?) Oo, hindi PERA, hindi basta basta pera lang! Dahil ang gusto ko ay MABANGO, MALUTONG at PERANG BAGO. Hehe Aminin natin, nung kabataan natin, yan talaga ang gusto natin. :D

Six Pocket. Gigising ng maaga. Maliligo. Suot suot ang bagong pamaskong bili ni nanay. Pinagmamayabang ang plantsadong SIX POCKET na pantalon. Dahil ang uso pag pasko ay ang maraming bulsa na pantalon. Naalala ko lang noong elementary days, paglabas ko pa lang ng bahay, pag nagkita kita kami ng mga kalaro ko’t kapitbahay na kasabay kong magmamano sa mga tita’t tito, bilangan agad kami ng bulsa. ”Ilan ang bulsa mo?” Paramihan nga kasi, BIDA ka pag ikaw ang may pinakamarami. Pag nagkatablahan pa nga, pati BULSA sa BRIEF, isasama rin, manalo lang. Ang tanong, marami ngang bulsa ang pantalon, marami naman kayang ma-a-aguinaldo?

Magkano ang naaguinaldo mo? Panalo man ako sa paramihan ng bulsa, ayaw ko mang aminin, ako ang pinakakulelat pagdating sa paramihan ng na-aguinaldo. Kumusta naman, dalawa lang ang NINONG ko. Dalawa na nga lang. Tinataguan pa ako. Kaya pag mga hapon na, tapos na ang pagmamano sa mga Ninang at Ninong. Bilangan time na! ”Magkano ang naaguinaldo mo?” Kulelat ako, sila na ang panalo. Kayo na! Bata nga naman. :)

Ano nga ba ang sukatan ng tunay na kasiyahan tuwing pasko?
Sa dami ng nakahanda sa noche buena sa mesa nyo?
Sa dami ng naaguinaldo?
Sa dami ng bulsa ng pantalon mo?
Sa dami ng nabigyang regalo?
Sa dami ng inaanak na nataguan ngayong pasko?
Para sa akin. Basta kumpleto ang pamilya, at sama-sama, masaya na ako.
”Dahil walang katumbas na kasiyahan, ang mamasko sa tabi ng mga taong mahal mo.”
( Noks nomon! Yun na! :))

Merry Christmas! God bless us all. Namamasko po. :)